മോർമുഗാവോയിൽ പുതിയ ആരോഗ്യ കേന്ദ്രം വരുന്നു.

പനാജി: ഗോവയിലെ മോർമുഗാവോയിൽ ആരോഗ്യ സേവനം മെച്ചപ്പെടുത്തുന്നതിനായി ഒരു പുതിയ 20 ബെഡ് പ്രാഥമികാരോഗ്യകേന്ദ്രം വരുന്നു. ഇതിന് ആവശ്യമായ 4,000 ചതുരശ്ര മീറ്റർ സർക്കാർ ഭൂമി ആരോഗ്യ വകുപ്പിന് കൈമാറാൻ സംസ്ഥാന മന്ത്രിസഭ അനുമതി നൽകി. നോർത്ത് ഗോവ കലക്ടർ ഈ നിർമാണത്തിനായി 4,030 ചതുരശ്ര മീറ്റർ ഭൂമി മാറ്റി നൽകാൻ ആരോഗ്യ സേവന വകുപ്പിന് നിർദേശിച്ചിരുന്നുവെന്ന് റിപ്പോർട്ടുകൾ വ്യക്തമാക്കുന്നു.

ഈ ഭൂമി നേരത്തെ “Govt” എന്ന പേരിൽ രജിസ്റ്റർ ചെയ്തതാണെന്നും, വാസ്കോ ഡ ഗാമയിലെ സിറ്റി സർവേ വിഭാഗം നൽകിയ ഫോം ബി രേഖകളോടൊപ്പം, സർവേ രേഖ, സൈറ്റ് പ്ലാൻ, ആസൂത്രണ വികസന അതോറിറ്റിയുടെ അനുമതി, വനവകുപ്പിന്റെ റിപ്പോർട്ട് എന്നിവയുടെ അടിസ്ഥാനത്തിലാണ് കൈമാറ്റം നടക്കുന്നതെന്നും അധികൃതർ വ്യക്തമാക്കി. പുതിയ ആരോഗ്യ കേന്ദ്രം പ്രവർത്തനം ആരംഭിച്ചാൽ പ്രദേശവാസികൾക്ക് മികച്ച ചികിത്സ ലഭ്യമാകുമെന്ന പ്രതീക്ഷയിലാണ് ജനങ്ങൾ.