ഗോവ – ഡിസംബർ 6 ന് 25 പേരുടെ മരണത്തിനിടയാക്കിയ തീപിടുത്തവുമായി ബന്ധപ്പെട്ട കേസില് തായ്ലാന്റിലേക്ക് കടന്ന ബിർച്ച് ബൈ റോമിയോ ലെയ്ൻ നൈറ്റ്ക്ലബിന്റെ സഹ ഉടമകളായ ഗൗരവ്, സൗരഭ് ലുത്ര എന്നിവരെ ഗോവയിലെത്തിച്ചു. ഇന്ന് രാവിലെയാണ് ഇരുവരേയും ഡൽഹിയിൽ നിന്ന് ഗോവയിലേക്ക് കൊണ്ടുവന്നത്. വൈദ്യപരിശോധനയ്ക്കായി ഇരുവരെയും ആദ്യം നോര്ത്ത് ഗോവയിലെ സിയോലിമിലുള്ള ഒരു പ്രാഥമികാരോഗ്യ കേന്ദ്രത്തിലേക്ക് ആദ്യം കൊണ്ടുപോയി. പിന്നീട് മപ്സയിലുള്ള ജില്ലാ ആശുപത്രിയിലേക്കും കൊണ്ടുപോയി. വിമാനത്താവളത്തിൽ നിന്ന് ആറ് പോലീസ് ജീപ്പുകളുടെ ഒരു സംഘം ഇവരെ അനുഗമിച്ചിരുന്നു. രണ്ട് സഹോദരന്മാരെയും വെവ്വേറെ വാഹനങ്ങളിൽ ഇരുത്തിയാണ് കൊണ്ടുപോയത്.
അർപോറ നിശാക്ലബ്ബിലുണ്ടായ തീപിടുത്തവുമായി ബന്ധപ്പെട്ട് ഗോവ പോലീസ് ഇവരെ ചോദ്യം ചെയ്യുമെന്ന് ഒരു ഉദ്യോഗസ്ഥൻ പറഞ്ഞു.
ചോദ്യം ചെയ്യുന്നതിനായി ലുത്ര സഹോദരന്മാരെ അഞ്ജുന പോലീസ് സ്റ്റേഷനിലേക്ക് കൊണ്ടുപോകാൻ സാധ്യതയുണ്ട്. പ്രതികളെ പതിവ് റിമാൻഡിനായി മപ്സ കോടതിയിൽ ഹാജരാക്കുമെന്ന് ഒരു ഉദ്യോഗസ്ഥൻ പറഞ്ഞു.
തീപിടുത്ത ദുരന്തത്തിന് ശേഷം, കൊലപാതകത്തിന് തുല്യമല്ലാത്ത നരഹത്യ ഉൾപ്പെടെയുള്ള വിവിധ കുറ്റങ്ങൾ ചുമത്തി അഞ്ജുന പോലീസ് ലുത്ര സഹോദരന്മാർക്കെതിരെ കേസെടുത്തിരുന്നു. നിശാക്ലബ്ബിൽ
തീപിടുത്തമുണ്ടായി മണിക്കൂറുകൾക്ക് ശേഷം, ഡിസംബർ 7 ന് പുലർച്ചെ ഇരുവരും ഫുക്കറ്റിലേക്ക് (തായ്ലൻഡ്) ഒളിച്ചോടിയിരുന്നു. ഇത് ഇന്റർപോൾ ബ്ലൂ കോർണർ നോട്ടീസ് പുറപ്പെടുവിക്കാനും അവരുടെ പാസ്പോർട്ടുകൾ റദ്ദാക്കാനും അധികാരികളെ പ്രേരിപ്പിച്ചു.
ഇന്ത്യൻ സർക്കാരിന്റെ അഭ്യർത്ഥനയെത്തുടർന്ന് ഡിസംബർ 11 ന് തായ്ലൻഡിലെ അധികാരികൾ അവരെ ഫുക്കറ്റിൽ കസ്റ്റഡിയിലെടുത്തു, തുടർന്ന് ഇരു രാജ്യങ്ങളും തമ്മിലുള്ള നിയമപരമായ ഉടമ്പടികൾ പ്രകാരം അവരെ നാടുകടത്താൻ തായ്ലൻഡിലെ ഉദ്യോഗസ്ഥരുമായി ഏകോപിപ്പിച്ചു.
തീപിടുത്തവുമായി ബന്ധപ്പെട്ട് അഞ്ച് മാനേജർമാരെയും സ്റ്റാഫ് അംഗങ്ങളെയും ഗോവ പോലീസ് ഇതിനകം അറസ്റ്റ് ചെയ്തിട്ടുണ്ട്.
