ക്രെഡിറ്റ് കാർഡ് ഉപയോക്താക്കൾക്ക് വലിയ തിരിച്ചടിയുമായി സുപ്രീംകോടതി

ക്രെഡിറ്റ് കാർഡ് കുടിശ്ശിക തിരിച്ചടവ് വൈകുന്നതിന് ബാങ്കുകൾ ഈടാക്കുന്ന പലിശ നിരക്കിന്റെ 30 ശതമാനം പരിധി നീക്കിക്കൊണ്ട് സുപ്രീംകോടതി നിർണായക വിധി പുറപ്പെടുവിച്ചു. ലക്ഷക്കണക്കിന് ക്രെഡിറ്റ് കാർഡ് ഉപയോക്താക്കളെ ബാധിക്കുന്ന വിധി ജസ്റ്റിസുമാരായ ബേല എം. ത്രിവേദി, സതീഷ് ചന്ദ്ര ശർമ എന്നിവരടങ്ങിയ ബെഞ്ചാണ് പുറപ്പെടുവിച്ചത്. സ്റ്റാന്റേർഡ് ചാർട്ടേർഡ്, സിറ്റിബാങ്ക്, അമേരിക്കൻ എക്സ്പ്രസ്, എച്ച്എസ്ബിസി തുടങ്ങിയ ബാങ്കുകൾ ഈ പരിധിക്കെതിരെ ഹർജികൾ സമർപ്പിച്ചിരുന്നു. 2008-ൽ നാഷണൽ കൺസ്യൂമർ ഡിസ്പ്യൂട്ട് റിഡ്രസൽ കമ്മിഷൻ (എൻസിഡിആർസി) നിശ്ചയിച്ച പരിധി വിവിധ ചെലവുകളെ അവഗണിച്ചുവെന്നായിരുന്നു ബാങ്കുകളുടെ വാദം.